Ex via manzioli una via longa 
longa e storta coi còpi e i portoni 
traşandai silensiosa 
sèro i oci pasando e vedo dute ‘ste 
done 
sentade sui scagnei 
a far la maia o le calse 
tignindo un fero soto el braso ala 
venesiana 
sentade a gambe larghe 
le ciàcola le ciàcola … 

pasando tra le dò file 
strenşo el cul per no dimenarme sui 
tachi alti 
curvo la schena 
per no eser cusὶ alta 
e con ‘na man me tegno 
el regipeto che le tete 
no le me şbalòti 
alora scomὶnsio a saludar de qua 
e de là 

e lore a risponder 
bongiorno bongiorno picia 
ciao bela come te staghi 
e come sta tuˈ mama 
bongiorno go visto tu’ nona 
stamatina 
ciao e tu’ fradel e tu’ şὶo el şè 
ancora a trieste 
ciao bongiorno te studi ancora 
povera fὶa 
la via şè longa e no la finisi mai e mi
sudo sudo tanto 
parchè fa caldo e parchè … 
e sudo anca se le gà şà rinfrescà
dute ste piere grişe 
davanti le porte co’ la lisiva che ghe şè
restà 
dopo gaver fregà pavimenti scale 
e scalini 

iera un patὶr pasar sta via 
le odiavo per quel sparlasar de drὶo 
ogi 
ogi però le me manca tanto dute 
quante ˈste done 

le me manca tanto ogni giorno che 
paso per sta via dove nisùn no me 
varda e nisùn no me dişi più 
bongiorno bela bongiorno fὶa mia 
come te staghi cara