Una sera de piova 
ma tanta piova 
che la se mescolava co’le mie lagrime 
scorendo şò pal viso 
fasendo canai in tele rughe 
caminavo col paso de chi no sa  più dove’ndar 
in t’un bel parco del nord 

in tel fango go visto 
un punto bianco 
un picio orseto 
con un cuorişin roso 

lo go lavà e sugà 
dopo ga visto ch’el ga un boton par fracàr 
soto el cuorişin 
e ch’el faˈna nuşicheta 
dişendo i love you 

şè pasà tanto ma tanto de quel tempo 
che nisun no me dişi più
te amo 

cusì ˈdeso me lo porto sempre drìo 
e ogni volta che voio 
o che sento el bisogno de cocole 
struco el boton 
e lù me dişi sempre 
co ˈna voşe sai strana 
i love you 
i love you 
i love you 
i love you 

made in china